పోలీసు

“మాలోని మనిషివే మా మనిషివే నువ్వు, 

పొట్టకూటికి నీవు పోలీసువైనావు” 

----

ఆనాడు దొర డాయర్ చెప్తే తోబుట్టువుల

మీదే తూటాలు పేల్చిన కెరీరిష్టువు, 

ఇంద్రవెల్లిలో నిరాయుధుల్ని చెండాడిన కర్మబద్ధుడవు!

ఎన్నలేనన్ని ఎన్కౌంటర్లు చేసిన ఎండిన హృదయం కలవాడవు!

రాజకీయ చదరంగంలో కుందేలు లాంటి బంటువు,

హుకుం అందితే చాలు .. 

గ్రద్ద గోటివి అయిపోతావు,

పాము కోర వయిపోతావు, 

ఇనుప చువ్వ వయిపోతావు,

లాఠీ వయిపోతావు!

అయినా అందరితో పాటు నువ్వూ మార్కెట్ బాధితుడవు, 

అందుకే చిల్లర కోసం చంపుకుతింటావు.

చలి చీమల పట్ల కాలుడవవుతావు!

బడా చోరులకు బంట్రోతువు!

సాహేబు గారి దొడ్డిలో పూల మొక్కకి నువ్వు రక్షకుడవు,

మెరిసే ఈ భూటకపు ఉపరితలానికి అనువైన కాపువు,

దొరగారి డబ్బుసంచులకు చవకైన చౌకీదారువు!