కవిత్వం లాంటిది లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
కవిత్వం లాంటిది లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

16, అక్టోబర్ 2015, శుక్రవారం

నే.. నే..

సరిగ్గా మనం పుట్టిన సమయాన్నే జన్మించాడో మనిషి

నాలానే .. 
             ఇదేమి? అదేమీ? వారెవరు? వీరెవరు? నాకెవరు? నీకెవరు? నేనెవరు?
                                                .. అని ప్రశ్నల మీద నడకలు నేర్చుకున్నాడు. 
మనిద్దరికంటే ముందరనే .. 
             ఈ ప్రపంచమొక గాజుమేడ అనీ  
                                               .. ఇక్కడి గోడలన్నీ పారదర్శకాలనీ తెలుసుకున్నాడు.
అందరిలానే .. 
             గతం బింగించే పాశం నొప్పిస్తున్నా, భవిష్యత్తు భయం పుట్టిస్తున్నా, 
                                               .. వర్తమానంలో ఊపిరి అందితే చాలనుకున్నాడు. 
నీలానే .. 
             సాహసం లేని మార్గం మీద మమకారం కలుగక, 
                                               ..  ఖర్జూరాలని వెతుక్కొంటూ కఠినమైన ఎడారి మార్గం పట్టాడు. 
అలానే ..  
             ఎడారి మార్గాన కనిపించిన ఒయాసిస్ మీద మనసు పారేసుకున్నాడు .. 
                                               .. పూజలు చేసాడు, మోకరిల్లాడు ..  కవితలు రాసాడు. 
ఇలానే .. 
            ఈ క్షణం ఇదే రీతిలో నిన్నూ నన్నూ  ఇరికించి ఇద్దరికీ అర్థంకాని కవితేదో రాస్తున్నాడు. 

25, సెప్టెంబర్ 2015, శుక్రవారం

కవికి విన్నపం

శోక కవిత్వం రాయమాకు కవి.. నియంత్రించుకో!
వీలయితే ఓ అనాథ కవితని చేరదీసి దాని ముఖానికి నవ్వు అద్ది మాకివ్వు.
ఎలానో చెప్తాము విను ..
కళ్ళు మూసుకొని ప్రేయసిని తలుచుకో,
హృదయంలో ఆమె బింబాన్ని నింపుకో. ఇప్పుడు చూడు!
మెదడులో, మనోవాక్కులో, కవిత్వంలో.. అందం తానంతట అదే పరవళ్ళు తొక్కుతుంది!

భయం వలదు కవి .. ప్రేయసి బింబం పూర్తిగా నీ సొంతం!
బింబాన్ని శోక కవిత్వంతో తడి చేయకు ..
ఊరికే గుండెని నలిపి బింబం పైన వేలిముద్రలు పడనీయకు!
దృష్టి మాత్రం బింబం మీద లగ్నం చేసి కవిత రాసి చూడు
మంచి మంచి పదాలు వాటికవే ద్రోల్లుకొంటు వచ్చి నవ్వుకుంటూ చేరతాయి..
ప్రయత్నించి చూడు ..

మమ్ము బాధించకు కవీ! విన్నవించుకుంటున్నాము ..
నువ్వేదో ప్రపంచ భారమంతా మోస్తునట్టు.. మాకు నీ మీద జాలి కలిగించాలని చూడకు!
నీకు మనసులో నొప్పి కలిగితే దాన్ని కడుపులోకి దిగమింగు!
మా మీద మాత్రం నీ శోకాన్ని కక్కకు!
నీ ప్రేయసి కోసం రాస్తున్నావనుకొని ఒక నాలుగు పంక్తులు రాసి ఇటు వదులు
ఆపై నీ బాధని నీలోనే అరిగిపోనివ్వు.

గుండెలనిండా ఊపిరి పీల్చుకొని వదులు, నిన్న రాత్రి కలని జ్ఞాపకం తెచ్చుకో,
నిజంతో పోల్చుకోకు! ఆ జ్ఞాపకమే నిజమనుకో ..
ప్రేయసి తన కళ్ళతో నిన్ను పిలిచిన వైనం ఓసారి గుర్తు తెచ్చుకో
అరెరే కవి! ఆ ఊహకే నీ పెదవి మీద నవ్వు మెరిసిందే!
అరే! సిగ్గు కూడా పడుతున్నావా కవీ? ఆహ! ముఖం అంతా వెలిగిపోతుందే!
ఆ వెలుగేదో మాకు కూడా పంచిపెట్టు కవీ
మెమెల్లరూ సుఖించెదము నిన్ను అశీర్వదించెదము!

24, సెప్టెంబర్ 2015, గురువారం

ఓ గణిత మేధావి!




ఒక్కో ఆలోచనా ఒక్కో మహా గణితాద్భుతం!
మాట మాటలోనూ సుస్వరం!
ఎంత జ్ఞానం ఎంత జ్ఞానం ఎంత జ్ఞానం!
అనంతం ముందు అసామాన్య వినమ్రత!
మాటలోని కటువైన స్పష్టత!
మెదడున కస్సుమని దిగే స్పష్టత!
అబద్ధం ఆడలేని నీ అమాయకత్వం!

మా మనసుల్లో నిన్నే చూస్తున్నాము,
చేతల్లో నిన్నే అనుకరిస్తున్నాము
నీ గురించే ఆలోచిస్తున్నాము
నువ్వు చూపించిన మార్గాన్నే నడుస్తున్నాము
నీ కలనే మా కలగా తపిస్తున్నాము.

ఒంటరిగా ఆలోచించమని మా తలలకు మమ్మల్ని వదిలేసినావు
మనసుని ఒప్పించుకోమని ఉపదిసించేవు.
మనసుని ఒప్పింప జేసే ప్రయత్నంలోనే మేము గణితాన్ని కనుగొన్నాము!
బలవంతుల్ని చేసావు మమ్ము మహానుభావా!
నీ ఋణమే ఈ అర్థవంతమైన ఆనందము!

ఊరేగింపులో భాజాభజంత్రీల్లో చివరి వరసలోని
సన్నాయి కిర్రు మందని ఏడ్చే వాళ్ళము మేము
ఆకాశ వీక్షణం చేయటం నేర్పించినావు మాకు పక్షిరాజుల ఓలే!
చూస్తున్నాము కొండలు కోనలు సముద్రాలు
అణువణువులో అర్థాన్ని! గణితాన్ని!
అగణితాద్భుత గణిత అద్భుతాలని!

---------------------
భౌతిక శాస్త్రవేత్త రిచర్డ్ ఫైన్మాన్ ని గుర్తు తెచ్చుకుంటూ.. 

19, సెప్టెంబర్ 2015, శనివారం

మధ్యరాత్రి మనసులో మార్పు!

ఒకనాడు ఎవరో ఏదో ఆలపిస్తున్నారు,
చీకట్లో నేనా శబ్దాలను యాచిస్తూ ఆలకిస్తున్నాను!
వింటున్న ఆ మాటల గురించే ఓ తపస్సులా యోచిస్తున్నాను,
దశలుగా ఆ మాటలతో ప్రేమలో పడుతూ వస్తున్నాను!
విని విని నేను వశం తప్పుతున్నాను,
నేను వింటున్నానన్న అక్కరు వారికే మాత్రము లేదు!

పిల్లనుగ్రోవి చెవిలో వారు ప్రేమగా ఊదుతున్న రహస్య మేమిటో నాకు పూర్తిగా అర్థమైతే కాలేదు ..
ఆ వెదురు బొంగుదీ నాదీ ఒకే జాతి!
లోనున్న వెలితి మాయిద్దరికీ సరిగ్గా సమానం ..
కళ్ళని చెమ్మ చేసే ఇలాంటి తీపి సంగీతంలో  కాలాన్ని- ఖాళీలని మర్చిపోతుంటాము ..
సుస్వర మనే పదార్థమే లేకుండుంటే, మేమిద్దర మేనాడో మరణిం చుండే వాళ్ళమేమో!

------
ఈ మధ్యరత్రివేల మనసులో ఏమిటీ కొత్త మార్పు? నిద్ర రాకనా?
లేక కరుణ లేని యీ చీకటి రాత్రి, వారి ఆలోచన నాలో సృష్టిస్తున్న మార్ప?
ఏదేమైనా, నాలో శోకాన్ని నయం చేయటానికి జరుగుతున్న ఈ మార్పును మించిన మందు లేదు.
పిల్లనగ్రోవిలా ఏడవటానికి, నాకు దానికున్నని కనులు లేవు!
-------------------------------------------------------------------------------

ప్రేరణ: తెలుగు వాళ్లకి 'సఖి'గా తెలిసిన తమిళ చిత్రం 'అలై పాయుదే' (అల ఎగిసెనే)లోని కవి వైరముత్తు గారు రాసిన 'ఎవనో ఒరువన్ వాసిక్కిరాణ్' అన్న పాటకి కాస్త దూరపు అనువాదం ఇది. తెలుగులో 'ప్రేమలే నేరమా  ఓ నా ప్రియ' అని వేటూరి రాసినదానికి  - దీనికి ఏ మాత్రం పోలిక లేదన్న విషయం గమనించగలరు. తమిళ మాతృకలోని నిరాకార వర్ణననల ప్రయోగం ఈ పాటని ప్రేమ - విరహం స్థాయికి మించి చాల ఎత్తుకి తీసుకెళ్లిందని నా అభిప్రాయం. 


11, ఆగస్టు 2015, మంగళవారం

ప్రేయసి తలపు

- ప్రాణానికి అత్యంత ప్రియమైన రాగం
                    ఆరోహణం ఎగసి ఎగసి శిఖరాగ్ర తీవ్రతకు చేరి అక్కడే ఆ పై చరియలలో గమకంగా ఊగిసిలాడుతున్న తరుణం!

- ఓ మహానుభావుడు అత్యంత శ్రద్ధగా రాసిన పుస్తకం చదువుతుండగా
                    ఇంకొక పుట దూరంలో మహాసత్యం ఒకటి బోధపదిపోతుందని స్పృహకి వస్తున్న తరుణం.

- తప్పు పొల్లుపోకుండా గుక్కతిప్పుకోకుండా కొనసాగుతున్న కవితా పఠణం..
                     తరువాతి పంక్తిలో వెంట్రుకలు నిక్కపోడుచుకొనే వర్ణన రాబోతుందని తెలిసి ఆత్రం..

- ఎప్పుడో ఆకతాయిగా నాటిన పిచ్చి విత్తనం
                     ఓ ఉదయం అనుకోకుండా చూసేసరికి నన్ను పలకరించి నవ్వుతున్న పచ్చదనం..

- ప్రపంచంలో ప్రతి అణువుకి రుణపడి ఉన్నాననిపిస్తూ 
                      ప్రతి అణువుకి నాతోనే పని యనిపిస్తూ లోలోపల నిరాడంభరత వేషంలో తలకెక్కుతున్న గర్వం. 

- తెల్లారితే ఇంటికి బుజ్జి కుక్కపిల్ల వస్తుందని తెలిసి 
                     ఉత్సాహంతో నిద్రపట్టక ఆనందంతో మనసు పెడుతున్న కలవరం.. 

12, జూన్ 2015, శుక్రవారం

ప్రేయసి నవ్వు

ఏమన్నావు..? ప్రేయసి నవ్వు మీద కవిత్వం రాద్దునా?
పదాలు నువ్విస్తావా మరి?
ఎలాంటి పదాలు కావాల్న? సరే చెప్తాను విను -
            - symmetry, simplicity, complexity: అన్నిటినీ కలిపి ఒకే పదంలో ఇమిడ్చి ఇయ్యగలవా?
            - beauty, beauty, beauty, beauty, beauty: ఒకే పదంలో అన్ని సార్లు 'అందం' ప్రతిధ్వనించి వినిపించాలి. అలాంటివి వెవ్వేరు పదాలు  ఒక అరడజను.
            - అంతం + ఆరంభం: రెండు అర్థాలు ఒకేసారి ఉండే పదాలు ఒక రెండు.
            - నెలవంకనీ చుక్కనీ కలిపి ఏమంటారు? ఒకే పదంలో చెప్పాలి! అదొక పదం కావాలి. వీలైతే ఓ పర్యాయపదం.
            - 'కరడుకట్టిన కారుణ్యం' - వినటానికి ఎలా ఉంది? అలాంటి పదం ఒకటి.
            - బలమైన తుమ్ము తర్వాత కళ్ళలో ఉండే ప్రశాంతత ఉంటుందే? దాన్ని కవిత్వంలో ఇమిడిపోయే లాంటి అందమైన పదంగా మార్చి కావాలి.
            - ఎడమ నుంచి కుడికి, కుడి నుంచి ఎడమకి, నిలువుగా, తలక్రిందులుగా - ఎలా చుసిన ఒకే అందం ఇచ్చే చమత్కారం పదాలు ఓ 888 కావాలోయి!
            - చిన్నప్పుడు గుర్తుందా? చీకట్లో వర్షం పడుతుంటే ఒక పెద్ద మెరుపు వచ్చేది .. ఉన్నట్టుండి అంతవరకు చీకట్లో ఉన్న ప్రపంచం క్షణం పాటు పగలు లాగ కనిపించేది? అప్పుడు మనసులో కలిగిందాన్ని ఏమని వర్ణించాలి? భయమా? ఆశ్చర్యమా? ఏదో అందం అర్థమైందన్న సంబరమా? అలాంటి భావనల్ని వర్ణించే పదం కలదా?
            - నీటి అడుగున ఊపిరి బిగబట్టి, ఒక నిమిషం వరకు అలానే బిగబట్టి, ఇంకొక నిమిషం కుడా బిగపట్టి, మూడో నిమిషం కూడా బిగబట్ట ప్రయత్నించి, ఇక ఆపుకోలేక  గబాలున పైకి వచ్చి అంత శ్వాసని ఒకేసారి పీలుస్తున్నప్పుడు ఊపిరి మీద తప్ప వేరే దేని మీదకి దృష్టి పోనీ అనుభూతి తెలుసునా నీకు? దాన్నేమంటారు?
            - మొదటిసారి సముద్రం అలల చివర్న సాహసంగా తొక్కి.. నీళ్ళు చల్లగా ఉన్నాయని ఎవరికైనా చెప్పాలనిపించే అత్యుత్సాహం. ఆ భావనని సరిగా అభివర్ణించే పదం.
            - కరుణకు పరవశించి పోయే బుజ్జి కుక్కపిల్ల పశుత్వంలోని అమాయకత్వము! దీనికో పదం కలదా? అది చివరిగా నా మనసుని వర్ణించుకోటానికి!

నా ప్రేయసి నవ్వుని వర్ణించాలనుకోవటం సూర్యకిరణాన్ని విరిచి జేబులో పెట్టుకోవాలనుకున్నంత వెర్రి ప్రయాస!
ఆ నవ్వు  వెలుతురులో photosynthesis చేసుకొని, గుండె దాహం తిరటానికి సరిపడా cardio-hydrates సమకూర్చుకొంటే దానికదే ఒక ముగింపు!

2, మార్చి 2015, సోమవారం

జీవిత కష్టాలు

ఏమంటే ఏం చెప్తాము.. ఒకొక్కరిదీ ఒక్కో కష్టం.

- స్టైలిష్ యువకుడా? జోక్స్ వేసే యువకుడా? తేల్చుకోలేక పోతుంది పడుచుపిల్ల.

- caste ఫీలింగు, కన్న కూతురి మీద ownership ఫీలింగు - కడుపులో కత్తులాట ఆడుతున్నాయి పెద్దాయనకి.

- పదో తరగతి పాస్ అయిపోతే జీవితం పూలబాట అయిపోతుందని నలభై ఏళ్ళ క్రితం చెప్తే నమ్మిన ఆ ఆద్మీ, ఈ రోజు పిల్లల పెళ్లిల్లు చేసేస్తేనయినా ఆ పూలబాట ఏదో ఎదురుతుందేమో నని చూస్తున్నాడు.

- ఎక్కడో సుఖంగా జీవిస్తున్న మనుషుల మీద ప్రతీకారంతో  కలంతో కర్కశంగా కారాలు నూరుతూ కవితలు రాసేస్తున్నాడు ఓ ఆవేశ పూరిత కవి.

- DSLR ఫోటోగ్రఫీలో పూర్తిగా మునిగిపోయి తేలటం మర్చిపొయినాడు ఓ యువకుడు!

- భగవంతుని ఇజ్జత్ కాపాడటం కోసం బయలుదేరుతున్నాడో మతోన్మాది. భక్తుడు.

- భాషోద్ధరణ చేయలేక చేతులెత్తేయలని  decide చేస్తున్నాడు ఓ యువ రచయిత.

- "అమ్మాయికి పెళ్లి చెయ్యరా?" అని చచ్చిపోతున్నాడు సంవత్సరికం భోజనాలకు మాత్రం దాపరించే శ్రేయోభిలాషి.

- సరైన ఫిగర్ ని లైన్ లో పెట్టి నలుగురికీ మగతనం చాటి చెప్పుకోవాలని చూస్తున్నాడు యువక్!

- "బోధించిన సన్మార్గ వచనముల బొంకు జేసి దా పట్టిన పట్టు సాధించెనే ఓ మనసా" అని పాడుకుంటాడు త్యాగరాజు.

- స్నేహితుణి exact salary figure తెలియక ఉక్కిరిబిక్కిరి అయిపోతున్నాడు ambitious man ఒక్కడు!

- కష్టం లేకుంటే సుఖం లేదనీ, సుఖం లేకుంటే కష్టం లేదని ఏదేదో చెప్పేస్తున్నాడు సోక్రటీస్.

- "జీవితంలో కావాల్సింది ఇంత కంటే ఏమున్నది?" అని సిన్సియర్ గా ప్రశ్నించుకొంటున్నాడు ప్రేయసిని కౌగిలించుకున్న ప్రేమికుడు.

- "జీవితంలో కావాల్సింది ఇంత కంటే ఏమున్నది?" అని సిన్సియర్ గా ప్రశ్నించుకొంటుంది ప్రేమికుని కౌగిట్లోని ప్రేయసి.

- వెధవలా ఏడుస్తున్నాడు అప్పుడే పుట్టిన పిల్లగాడు.

- వెకిలి మొహం వేస్కోని చూస్తున్నాడు కుర్రవాడు, వెర్రివాడు!

- బుగ్గలో చింతపండు చప్పరిస్తూ, ఆకాశం వైపు చూసి ఆలోచిస్తున్నాడు భవిష్యత్తు కథా నాయకుడు!

- వయొలిన్ నేర్చుకోంటోంది ఎదురుకాలపు మార్గదర్శకుని తల్లి!

- వెకిలి వీరుడి కోసం కల కంటూ మత్తులో మూలుగుతోంది ఓ కన్నె పిల్ల.

- జత కోసం కీచురాళ్ళ జాగారం, లైట్ వెలగంగానే బొద్దింకల ప్రాణభయం.

- "తలుపు కిర్రు మనలా? బానిస పీనుగు మొర్రో మనలా? షావుకారు ముసలాయన హరీ మనలా? దద్దోజనంలో తాలింపు చిటపట లాడలా? వెధవది అన్నీ శబ్దాలేగా ఒకటి శృతి మరొకటి అపశృతినా?" అంటున్నాడు తత్త్వవేత్త.

11, ఫిబ్రవరి 2015, బుధవారం

ప్రశ్నలు - ఉదాహరణలు.

1)
నువ్వంటే నాకు  సిగ్గో - భయమో అర్థం కాదు!
నా పట్ల నీకు కోపమో -  చులకనో అంతు చిక్కదు.
నీ నుంచి నేను ఉద్భవించానో, లేక నా ఊహలో నువ్వు ఘనీభావించావో తేల్చుకొనే వీలు లేదు.
ప్రశ్నిస్తున్నావో, పరిక్షిస్తున్నవో, అర్థం కానీ సమాధానాలు చెప్పి ఉక్కిరిబిక్కిరి చేస్తున్నావో?

2)
లోభానికి - భక్తికీ మధ్యన ఎన్ని అడ్డ చారలు గీసినావు?
ప్రేమకి - వ్యాపారానికి మధ్యన ఎన్ని పరదాలు పరిచినావు?
అద్దంలో తన కండలు చూస్కొని మురిసిపోయే యువకుడికి - పుత్రోత్సాహంతో పొంగిపోయె ముసలాయనకి
                                                            మధ్య చత్వారంలో ఎన్ని పాయింట్ల  వ్యత్యాసం కూర్చినావు?
చీకటికి - చీకటికి  మధ్యన ఎన్ని ఉదయాలు అమర్చినావు?

3)
* సముద్ర గర్భంలో జీవరాసుల రంగుల వెనకాల మర్మం ఏమిటీ?

* సికాడా ఈగలకి ప్రధాన సంఖ్యలకి సంబంధం ఏమిటీ?

* ఒక్కో జాతి తేనెటీగకి ఒక్కో పువ్వు మక్కువ అవుతుందా?

* గడ్డి తనను తానూ రక్షించుకుంటుందా?

* రోబోటిక్స్ జీవసస్త్రానికి ఎలా తోడ్బడుతుంది?

29, జనవరి 2015, గురువారం

కళా-రుచి, రుచి-కళ

వాక్యానికి మొదటి అక్షరం రాయనారంభించినప్పుడే చివరన చుక్క పెట్టాలని  తెలియనివాడు / మర్చిపోయినవాడు / ఒప్పుకోలేని వాడు / నమ్మలేని వాడు - వాక్యాన్ని పిచ్చి వంకరలు తిప్పుతాడు, వెర్రి వాగుడు వాగుతాడు!
ఎప్పటికైనా అంతమయ్యే వాక్యమే అర్థవంతమైన వాక్యం.

చుక్కని చూసి భయపడటంలో రుచి లేదు,
చుక్క ఎక్కడ పెట్టినా అక్కడికి ఒక అర్థముండేలా అందమైన లోతైన పదాలని కూర్చడం రుచి.
ఈ రుచిలోని వ్యత్యాసాలే జ్ఞానంలోని వ్యత్యాసాలుగా రూపుదాల్చుకుంటాయి..
ఈ జ్ఞానమే తిరిగి వాక్యార్థంలో ప్రతిబింబిస్తుంది, కళని తెస్తుంది.

ప్రతి ఒకరికి ఒక్కో వక్యాన్ని రాసే అవకాసం దొరికింది, తమ తమ జీవిత వాక్యాన్ని ఎలా తీర్చి దిద్దుతారు అన్నది తమతమ కళా-రుచి, రుచి-కళ. 

25, నవంబర్ 2014, మంగళవారం

కార్యసాధకా!

నీ మాట వినేవాళ్ళు లేకపొతే, నీతో రాకపోతే ..
                      ఒంటరి గా అడుగు వెయ్యి!

అందరూ భయపడితే, ముఖం దాచేసుకుంటే, పిరికిగా గోడచాటున దాక్కోనేస్తే ..
                       ప్రాణ మిత్రమా ..
                       ఆత్మసాక్షిని గుప్పెట్లో పట్టుకొని, మనసులోని మాటని నోరు తెరచి చెప్పు!

అందరూ తిరిగి వెళ్ళిపోతే, నిన్ను ఒంటరిని చేసి కారడవి చీకట్లో వదిలేసి పోతే?
                        సఖా ..
                        ముళ్ళ మీద అడుగులు వేసుకుంటూ
                        రక్తం కారుతున్న పాదాలను ఈడ్చుకుంటూ మార్గం చేసుకుంటూ ముందుకు సాగు!

దీపం వెలుగక పొతే,
చీకటిలో, గాడ్పులో, తుఫాను వానలో, గూటికి దిక్కుతెలియని స్థితిలో ఉంటే  ..
                        ఓ కార్యసాధకా!
                        మబ్బుల మధ్యన వజ్రాయుధాన్ని పెకలించి తీసి నీ హృదయాన్ని అంటించుకో!
                        దాన్ని ఉజ్జ్వలంగా వెలుగని! ఆ తీవ్ర జ్వాలలో స్వయంగా  ప్రకాశించు!

---------------------------

ఇది టాగోర్ రాసిన  'ఏక్ల చోలో రే' అనబడు బెంగాలీ గీతానికి (ఇంచుమించు) తెలుగు అనువాదం. 2005 కాలంలో తోటి బెంగాలీ మిత్రులు పాడుకుంటుంటే  అయిష్టంగా విన్నది! అప్పటికి బెంగాలీ  భాష ((మరియు దాని గొప్పదనం) కనీసం ఇప్పుడంత కూడా) తెలియననప్పటికీ ఆ గీతం చాల శక్తివంతమైనదిగా ఆ రోజే నా చెవులకు వినిపించింది. హ్రస్వదృష్టితో చుస్తే బిందెడు నైరాశ్యం, కాస్త నిశితంగా చుస్తే సముద్రమంత స్ఫూర్తి ఈ పాటలో వినిపిస్తాయి. ఒంటరితనంలోని realityని, inevitabilityని, blissని, permanencyని ఆహ్వానించలేని వాళ్ళు ఒంటరితనానికి దూరం పరిగెట్టి పరిగెట్టి జనారణ్యంలో చిక్కుకొని ఒంటరులు అవుతుంటారు. నూతిలోకి నేరుగా పడే రాయి ఒకటైతే కాస్త శబ్దం చేసి పడే రాయ మరొకటి.


18, అక్టోబర్ 2014, శనివారం

ఓ మార్గదర్శి!

రక రకాల ఆనందాలు ఒకేసారి పొంగుతున్నాయి మనసులో !
ఏ ఆనందం దేనికోసమో అర్థం కావట్లేదు ! ఒక దాని కొకటి పోలికలు లేకుండా ఉన్నాయి రంగులు !
నీ చేయి గెట్టిగా పట్టుకోనివ్వు .. నువ్వు ఎటు పరిగెడితే అటు నీతోనే నేనొస్తాను ..

జీవితోదయాన గాలి వెచ్చగా తగిలి .. చలి తొలగి మేనంతా పరమానందం అయింది!
బద్ధకం విడిచి ఒళ్ళు విరుచుకున్నాను ..
ఊపిరిలో జీవం నిండి హృదయం పరవశం అయింది!
ఉలిక్కి పడి వేగం పెంచి పరిగెత్తాను ..
అడుగులో అడుగు వేసుకొంటూ, క్షణానికి క్షణం వేగంతో,
కాళ్ళకింది భూమిని వెనక్కి నెడుతూ పరిగెత్తుతున్నాను..
కనిపిస్తావు కాని అందవు!
నీకు అలసట ఉండదు. మా లాగ వెర్రి వ్యామోహాలు ఉండవు!
నీ గురి మహోన్నతమైనది!

నిన్ను అందుకొనే ప్రయత్నంలో నా మూర్ఖపు వలువలు,
అజ్ఞానులు పొగుడ్తూ బహుకరించిన కుచ్చు టోపీలూ ..
అహంకారం, మూర్ఖత్వం, మూఢత్వం ..
వీటన్నిటిని అన్ని దిశలకూ విసిరేస్తూనే ఉన్నాను ..
కాని ఇంకా నా పరుగులో నీ పరుగు అంత స్పష్టత లేదు! నీ గురి నాక్కూడా ప్రసాదించవేమని?
అవును.. నీకేం పని?!
ఓ తార్కిక! ఓ హేతుక! ఓ సంవాది! ఓ గణిత మేధావి!
నీవుగా నీవుండటానికి నీకెలా ఉంటుంది?

ఆకారంలో, వికారంలో, అలంకారంలో, కూర్పులో, ప్రళయంలో అన్నింటా ఆనందమే యని తెలుస్తున్నది
కంటి ముందు, కంటి వెనుక,
ఆకాశంలో, మనసులోపల,
గణితం కానిది ఏది లేదు యని తెలుస్తున్నది ..

ఇంకొంత కాలం, ఇంకాస్త ప్రయత్నం ..
మహాశయా నీ వేగాన్ని నేను చేరుకొనెదను!
నీ చూపు పదునైనది!
నీ దృష్టి నిర్మలమైనది!
నీ పరుగు తిరుగులేనిది!
నీ లెక్క తప్పుపట్టలేనిది!!
అబద్ధాన్ని ఖండించే నీ తర్కం విశిష్టత వర్ణించలేనిది ..
ఓ తార్కిక! ఓ హేతుక! ఓ సంవాది! ఓ గణిత మేధావి!


--------
తార్కిక  = logician.
హేతుక   = rationalist.
సంవాది  = one who makes rational arguments.
గణిత మేధావి = god!

11, అక్టోబర్ 2014, శనివారం

జోల పాట?


పిల్ల గాలుల్ని ఎదిరించి నిలిచిందియని శాశ్వతం అనుకోనేవు!
చమురు యండక మానదు, దీపం ఆరక మానదు.
జీవితం కథ - తెర పడక తప్పలేదు ..

ఒక విసురు, అయ్యగారు!
ఒక విసురుతో .. పోగేసుకున్నది మొత్తం పొగలాగు మారి స్వేఛ్చగా ఎగిరిపాయింది.
ఇన్నాళ్ళు కంఠానికి బిగుసుకొని బాధించిన ఊపిరి-ఉచ్చు నీకు విముక్తినిచ్చి పోయింది!
మొదటి నుంచి.. లోపల ఎడతెరిపి లేకుండా పొడుస్తున్న హృదయస్పందన కూడా నిన్నిక బాధించబోదు!
అలసట లేదు, అనారోగ్యం లేదు, చింత-భయం-భ్రాంతి లేదు.
ఇక వచ్చి బజ్జో మిత్రమా!

ఉదయం - మధ్యాహ్నం - సాయంత్రం లేదు ..
నిత్యం శాశ్వతమైనది చీకటి మాత్రమే ..
చీకట్లో మెదలగలిగేవి జ్ఞాపకాలు మాత్రమే.

----
సృష్టి ఏదో ఉద్దేశ్యంతో ఉత్సవ స్ఫూర్తితో పాట పాడుతోంది ..
ఆ మహా గానంలో ఒక గమకానివి నీవు!
గానం ఇంకా కొనసాగుతుంది, కాని దానిలో నీ పాత్ర అయిపొయింది ..
అయిపోయిన నీ పాత్రని స్మరించకు ..
అద్దె కొంప మీది మమకారం వీడి సొంత ఇంటికి చేరుకో మిత్రమా!
దిగులు వలదు ..
వెలుతురు చూసీ చూసీ నీ కళ్ళు అలసిపోయాయి చూడు ..
ఇక వచ్చి బజ్జో!

ఉదయం - మధ్యాహ్నం - సాయంత్రం లేదు ..
నిత్యం శాశ్వతమైనది చీకటి మాత్రమే ..
చీకట్లో మెదలగలిగేది జ్ఞాపకం మాత్రమే.

ప్రేరణ (గుల్జార్ రచనికి పూర్తి అనువాదం కాదు):



24, ఫిబ్రవరి 2014, సోమవారం

కల - జ్ఞాపకం!


శైశవాన.. కోరికంటే అర్థం కాని ప్రాయాన..
చిగురించింది నాలో ఒక నాడు ఒక ఆశ!
నా ప్రజ్ఞని చీల్చుకొని మొలిచిన ఆ చిగురు
ఆ నాటి నుంచి నాతోటే .. తీగలా, సుందరవనంలా,
ఓ అతిశయ ద్వీపంలా ఎదుగుతూ నా మనసున విస్తరించింది..
పరసతం కానీయకుండా, ఆ బింబాన్ని గుండె నిండా బద్రపరుచుకునే వాణ్ని ..
ప్రతి నిద్రలో ఒకే స్వప్నం కంటూ జీవించే వాణ్ని!

ఈనాడు జాగృతావస్థలో లోకం దుమ్ముదుమ్ముగా నిస్తేజంగా ఉంది..
కానీ భవిష్యత్తులో ఒకనాడు ప్రపంచాన్ని-కాలాన్ని సవాలు చేసి మరీ నా కలల ద్వీపాన్ని చేరి తీరతాను!

ప్రపంచ పరిణామ క్రమం నుంచి నన్నొకణ్ణి తప్పించు చాలు..
నా శైశవ అజ్ఞానాన్నే తిరిగి నాకు ప్రశాదించు చాలు ..
నెరవేరే వరకు చిన్నప్పటి నా  కల-జ్ఞాపకం పదిలంగా ఉంటే అదే చాలు!

----
శైశవాన.. గానం అంటే అర్థం కాని ప్రాయాన..
ఒక రహస్య రాగంలో నా కలని ఆలపించాలని తపించి,
తీవ్రంగా ఆయాస పడేది నా హృదయం.
గుప్పెటితో హృదయాన్ని సముదాయించి
ఎందరో అనుకరించిన ఆ అద్భుత రాగాన్ని మళ్ళి మళ్ళి పాడుతూనే ఉండే వాణ్ని..
పాడిన ప్రతిసారి మెరుగు పరుచుకుంటున్నానని నమ్ముతూ జీవించే వాణ్ని!

ఈనాడు, రాగాలాపన చేసీ చేసీ ఆయాస పడుతున్నాను ..
కాని ఇప్పటికీ నా కల ఒకరూ అర్థం చేసుకో లేకున్నారు ..

కాలాన్ని వెనక్కి తిప్పగలిగే శక్తే ఉంటే ..
కన్నీటితో స్నేహం చేసిన నా బాల్యావస్థకు నన్ను ఈడ్చుకొని పోయి కుదేలు చెయ్యి చాలు!!
ఒంటరితనం నన్ను జయించలేదని ధైర్యం ఉంటే చాలు!

ప్రపంచ పరిణామ క్రమం నుంచి నన్నొకణ్ణి తప్పించు చాలు..
నా శైశవ అజ్ఞానాన్నే తిరిగి తిరిగి తిరిగి నాకు ప్రశాదించు చాలు ..
నెరవేరే వరకు చిన్నప్పటి నా  కల-జ్ఞాపకం పదిలంగా ఉంటే అదే చాలు!
ఒంటరితనం నన్ను జయించలేదని ధైర్యం ప్రశాదించు చాలు !



ప్రేరణ: One Piece - 'Memories' జపనీస్ మరియు ఆంగ్ల అనువాదాలు. 








9, డిసెంబర్ 2013, సోమవారం

లోపలి యంత్రాంగం -2

It is amazing how complete is the delusion that beauty is goodness.
- Leo Tolstoy, The Kreutzer Sonata

అందం అంటే
     .. ఒక లెక్క
     .. ఒక వరస 
     .. ఒక పద్ధతి 
     .. ఒక కూర్పు 
     .. నిగూఢంగా దాగి ఉన్న ఒక గణిత నియమం 
     .. అనంతమైన ఈ అస్తవ్యస్తతలో ఒక చిన్న చమత్కారం
     .. రొద మధ్యలో ఒక సుస్వరం

అస్థిపంజరం, మాంసం ముద్దలతో తయారైన భౌతిక శరీరం మీద micron మందం గల నశ్వరమైన ఒక అద్భుత మాయా పొర. అమాయక కంటికి మాత్రమే తెలిసేది జ్ఞానానికి అందనిది! విజ్ఞ్యతని అణచి పశుత్వానికి కట్టి పారేసే ఒక మహా మంత్రం. అందం పట్ల కలిగిన ప్రతి వ్యామోహం ఏదోక నాడు నిస్పృహగా గణువు అయ్యేదే, ఈ విషయం బోధపడటానికి ఎంత కాలం-అనుభవం కావాలి? చచ్చినా పర్లేదు.. అందాన్ని తాకగలిగితే చాలు అన్న ఆరాధన-ఆకలి కలగటానికి మనసులో బోల్డంత స్వచ్చత కావాలి. ఆ అమాయకపు ఆవేశం నుంచి పుట్టిన ప్రాణిరాసులమే కదా మన పశు-పక్ష-వృక్షాదులం అంతా.. 

ఆ నాటి నుంచి ఈ నాటి వరకు ప్రాణికి ప్రాణి చెప్తూ పంపిస్తున్న రహస్య సందేశం ఒకటే: "అందం కోసం ప్రాకులాడు.. అందం కోసం చుట్టూ వెతుకు, అందం కోసం చస్తూ బ్రతుకు! విశ్వ రహస్యాలని నీకు అందం అన్వయిస్తుంది.. అందం అంటే ఒక లెక్క, ఒక వరస.. విశ్వం గణితం మాట్లాడుతుంది.. వెతుకు harmony వైపు పరిగెత్తు.. అందుకో, సృష్టి ప్రణాళిక నీకు అర్థం అయిన కాకపోయినా నువ్వు అందం వైపుకి పరిగెత్తి పోరాడి ప్రాణశక్తిని హస్తాన్తరితం చెయ్యి.. నీ పని పూర్తి అయినట్టే!"

అందం అంటే 
    .. ప్రేయసి జుట్టు (blonde, brunette, red..)
    .. స్త్రీ కళ్ళు, చెంపల మీదకి విస్తరించిన నూగు జుట్టు 
    .. చెక్కిలి మృదుత్వం 
    .. స్త్రీ గొంతు, మెడ, భుజాలు.. 
    .. స్త్రీ యద, నడుము మృదుత్వం, మృదుత్వం, మృదుత్వం.. 
    .. తొడలు, పిరుదలు, మృదుత్వం, ఆశ్చర్యం, మృదుత్వం.. 
    .. సువాసన, పల్ల వరుస, నవ్వు, వెలుతురు! ఆనందం!
    .. గాలానికి వేలాడుతున్న ఒక రుచికరమైన ఎర! శ్వాస ఎలానూ శాశ్వతం కాదు కాబట్టి ఎరని చప్పరించి చనిపోతే ఇహ లోకంలో అయినా జన్మకి అర్థం మిగులుతుంది. 

అందం నిజమా? - తెలీదు .. 
అందం అవసరమా? - తెలీదు.. 
అందం శాశ్వతమా? - కాదు. కాబట్టే అందం! 
మరి హృదయం? - దానికి దీనికి సంబంధం ఏంటి?


29, అక్టోబర్ 2013, మంగళవారం

లోపలి యంత్రాంగం - 1

ఓ నా ప్రియాతి ప్రియమైన హృదయమా ఈ మాట ఒకసారి అలోచించి చూడు..

దీపం రెపరెప లాడుతునప్పుడే కాంతి శాశ్వతం కాదని జ్ఞానం మేల్కుంటుంది..
చలి నొప్పి నరాన్ని కొరుకుతున్న పోటులో సూర్యుని మీద అపార కాంక్ష కలుగుతుంది..
ప్రేయసి మీద నీకున్న ప్రేమ తను నిన్ను వదిలి వెళ్ళిన రోజే జ్ఞప్తికి వస్తుంది.
అందుకే వదిలి వెళ్ళాలనుకుంటే వెళ్ళిపోని ప్రేయసిని..
ఆ బాధలో, వ్యధలో.. చెదిరిన స్వప్నం.. మిగిల్చిన బూడిదలో నీ కన్నీళ్ళు పోసి
నీ ప్రేమని - నీ దైవత్వాన్ని సాక్షాత్కరింప జేసుకో!

కలత చెందిన నాడు ఒకప్పటి సుఖ వైభవం గుర్తొస్తుంది.. ఆస్వాదించు.
దారి తప్పిన చీకటి వేల వెళ్తున్న దారి మీద అనుమానం - ఇంటి మీద మమకారం!
మధ్యం చివరిబొట్టు తరువాత..
లోటా అడుక్కి చూసి మళ్లీ నీ కల నిజం కావాలని కోరుకుంటావు ..
కాని కలలు మెల్లగా నిజమవుతాయి, మిక్కిలి వేగంగా గనువవుతాయి..
తెలియనిదా నీకిది?

ఏమో.., ఏనాటికైనా నీవు తెలుసుకొనెదవేమో.. తాకగలిగిన ప్రతీది అశాశ్వతం ఎందుకు అవుతున్నదోనని?
కాని చూడు.. ప్రేయసి వదిలి వెళ్ళగా నీపై మిగిలిన బీటలు ఆమె ఆకరాన్నే గుర్తుకు తెస్తాయి..
ఏ గాలి పీల్చిన నాసికం ఆమె వాసనల్నే తెలుపుతుంది..
ఆమె భౌతికంగా దగ్గర లేకపోయేసరికి..  నీలోపల తెలియకుండానే ఆమె జ్ఞాపకాన్ని ఎంత పదిలం చేసావో తెలుస్తోంది..
మేఘాలు కమ్మిన రోజు కళ్ళు నక్షత్రాల కోసం వెదకినట్టు, ఒక్కో మినుకు ఒక్కో దివ్య దర్శనం!
ఒక్కో గాలితాకిడి ఒక మహామృదు అనంతానందభరితమైన స్పర్శ!
అందుకే వదిలి వెళ్ళాలనుకుంటే వెళ్ళిపోని ప్రేయసిని..

ప్రేయసి నెపం మాత్రమే. ఈ ప్రేమంతా తత్త్వతః అనాదిగా నీలోపలి ఉన్న యంత్రాంగం. నిస్సిగ్గుగా ఆస్వాదించు.


------------------------------------------------------------------------------

(నా ప్రేయసి కంటే నా ప్రేమ గొప్పది అన్న అహంకారంతో ఒకానొకప్పుడు రాసిన రాత ఇది. 
మరిప్పుడు అభిప్రాయం మారేనా? 
మ్మ్.. మారింది, తెలివి పరిణామం చెందింది..  
ప్రేయసి విలువ - ప్రేమ విలువ సమమైన నాడు ఈ వెలితి ఏ ఒక్క వైపు కనిపించబోదు.
ఆ సమతుల్యమే ఉంటే, ప్రేయసి కూడా ప్రేమని గుర్తిస్తే, గుర్తించి కరుణిస్తే .. విషాద సాహిత్యానికి జీవితంలో చోటు ఉండదు. అలాంటి ప్రేయసి వదిలిపోతే ఇక జీవితమే ఉండదు.)

8, అక్టోబర్ 2013, మంగళవారం

ఓ ప్రేమ కవి గోల!

దేహం ఓ వత్తి, ప్రేమ అది దహించగా వెలువడే వేడిమి..  
జీవితం పారే నది, ప్రేమ విలీనం కావాల్సిన సాగరం..  
జన్మ ఎత్తటం పాపం, ప్రేమ ప్రాయశ్చితం! 
హృదయం శిల, ప్రేమ శిల్పం!
పుట్టుక విత్తనం, ప్రేమ ఫలం
లోకం ద్వైతం, ప్రేమ అద్వైతం! 
సర్వం సూన్యం, ప్రేమ అనంతం! 
జన్మ మాయ, ప్రేమ అమరం!
విశ్వంలో ప్రేమ ఒకటే ఒకటి, ప్రేమని అనుభవించే శరీరాలు మారుతూ పోవును!




మూలం: వైరముత్తు - "యాక్కై తిరి"